XITOY IMPERATORLIGI HARBIY YURISHLARI
TARIXIDA DOVON DAVLATINING O‘RNI VA AHAMIYATI
Boburmirzo Iminjanov Xabibullo o‘g‘li,
Andijon davlat universiteti talabasi.
Xitoy imperatorligi tarixdagi eng buyuk va uzoq vaqt hukm
surgan davlatlardan biri hisoblanadi. Bu davlatni bir nechta sulolalar boshqardi.
Imperatorlikning o‘ziga xos harbiy yurishlar tarixi mavjud. Xitoyliklarning vaqti-vaqti
bilan bizning hududlarimizga ham ko‘zlarini tikkanlari hech kimga sir emas. Shu
jumladan Farg‘ona vodiysi hududlarida tashkil etilgan Dovon davlati ham xitoyliklar
ko‘z tikkan hudud hisoblangan. Dovon yurishlari Xitoy tarixida o‘ziga xos sahifa
ochdi. Quyida ana shu sahifa haqida so‘z boradi.
Farg‘ona qadimgi davrda ahamoniylar va yunonlar hukmronligi
davrida siyosiy erkini o‘z qo‘lida saqlab qolgan. Yunon mualliflari faqat salavkiylarning
lashkarboshisi Demodam miloddan avvalgi 280-yilda Yaksart (Sirdaryo) dan kechib
o‘tib yunon xudosi Apollon sha’nigamehrob (olovxona) o‘rnatdi, degan xabarni qoldirgan.
Yunon-Baqtriya podsholaridan birining Sharqiy Turkistonga Farg‘ona orqali bir marta
qo‘shin tortib borganligi haqida ham antik tarixchilar ma’lumot qoldirganlar. Yuqoridagi
fikr-mulohazalardan kelib chiqadigan bo‘lsak, qadimgi Farg‘ona davlati – Dovon miloddan
avvalgi II asrda emas, balki, ancha avval, III yoki IV asrlardayoq O‘rta Osiyo tarixida
shakllangan davlat sifatida mavjud edi. U qadimda Parkan deb atalgan. Uning Dovon
nomi esa xitoylar tomonidan berilgan nomdir.
Miloddan avvalgi II-I asrlardagi rivojlangan davr Farg‘ona
tarixida Sho‘rabashat bosqichi deb yuritiladi. Sho‘rabashat O‘zgan shahri yaqinida
joylashgan bo‘lib, vodiyning yirik shaharlaridan biridir, uning maydoni 70 gektarga
teng. Sima Syanning “Tarixiy xotiralar” asarida Dovonning ikkita poytaxti – Ershi
va Yuchen bo‘lganligi xabari beriladi. Miloddan avvalgi II asr (mil.avv. 125-yil)
da bu hududlarga kelgan Xitoy elchisi Chjan Syan bir nechta Dovon hukmdorlarining
ismini keltirib o‘tgan. Ularning nomlari xitoychada Mugua, Chan Fin, Yanlyu, Mosoy
deb berilgan. Hukmdor (“Van” deb atalgan) ning yonida eng yaqin qarindoshlardan
ikkita yordamchi – katta yordamchi (Fu van) va kichiki yordamchi (Fu-go van) bo‘lgan.
Hukmdor davlat ishlarini olib borishda oqsoqollar kengashiga suyangan. Chjan Syan
qadimgi Farg‘ona xalqi bilan, uning xulq-atvori, urf-odatlari, kuch-qudrati, tabiati
va hayvonot dunyosi bilan tanishar ekan, o‘z imperatori nomiga hisobot yozgan va
Xitoy imperatorining e’tiborini Dovonga tortgan.
Xitoyning Dovon uchun bo‘lgan mujodalasi tahminan miloddan
avvalgi II asrlarda boshlandi. O‘sha davrda Xitoyda Xan sulolasi hukmronlik qilardi.
G‘arbiy chegara hududlar hisoblangan Dovon yerlari tom ma’noda sharq va g‘arbni
bog‘lab turuvchi asosiy ko‘prik vazifasini bajarardi. Bundan tashqari, Buyuk Ipak
yo‘li deb nomlangan savdo-tijorat yo‘li ham aynan shu hududlar orqali o‘tgan. Bu
yo‘ldagi qit’alararo savdoda sharqiy So‘g‘diyona chegaralaridan to Tan davridagi
Xitoy imperiyasigacha bo‘lgan yo‘lning xavfsizligini ta’minlashda, oziq-ovqat, yo‘l
ko‘rsatuvchilar va tarjimonlar yetkazib berishda Dovon asosiy rol o‘ynagan. Bundan
tashqari, Farg‘onaning “samoviy duldullari” – arg‘umoq otlari ham Dovonni o‘z tasarrufiga
olishga undardi. Bu otlar tasviri tushirilgan qoyatosh rasmlari bizning kunimizgacha
yetib kelgan. Ayrimchatov, Obishirsoy, Aravon, Novqat qoyalaridagi suratlar shular
jumlasidandir.
O‘sha davrda Dovon aholisi ko‘p hamda iqtisodiy jihatdan
ilg‘or hududlardan biri hisoblanardi. Miloddan avvalgi II-I asrlarda Xitoy manbalari
qoldirgan ma’lumotlarga ko‘ra, Dovonda asosan dehqonchilik madaniyati avj olgan,
aholisi yilqichilik bilan mashg‘ul edi. Sharqiy Turkistondagi shahar-davlatlar tashqi
siyosat masalalarida o‘z hududlarini himoya qila olishlari uchun yagona bir birlik
bo‘lib birlasha olmadilar. Xitoy tarixchilari bu shahar-davlatlarning qo‘shinlari
haqida shunday ma’lumotlarni yozib qoldirganlar: “yakka holda ular juda ham zaif
hamda qo‘shinda o‘rnatilgan tartib yo‘q” [Бичурин Н. Я. “Собрание сведений о народах, обитавших в Средней Азии в древние времена”. Москва-Ленинград 1950, ст. 214]. Dovonliklar g‘arbda qang‘lilar, shimolda usunlar, sharqda esa uyg‘urlar
bilan yaqin aloqada bo‘lganlar. Xitoy bilan bo‘lgan janglarda ularni har doim qang‘uylar
qo‘llab-quvvatlagan. Xitoy manbalariga qaraganda, qadimgi Farg‘onani 419-yilgacha
bir sulola vakillari uzluksiz boshqarib kelgan. O‘rta Osiyo hududlarida Eftalitlar
davlati qaror topgach, qadimgi Farg‘ona davlati o‘z mustaqilligini yo‘qotgan.
Miloddan avvalgi 104-yilda Xan imperiyasi qo‘shini Dovon
hududlariga hujum qilishni boshladi. Farg‘onaliklar tomonidan Xitoy fuqarosi Che
Lining o‘ldirilishi hujumga sabab bo‘ldi. Lekin uzoq yo‘l, har qadamda mahalliy
hokimlar qo‘shinlari bilan (ayniqsa, Lobnordagi jang talofatli bo‘ldi) bo‘lib turadigan
to‘qnashuvlar Xitoy armiyasining tinkasini quritdi. Ular Farg‘onani egallash uyoqda
tursin, hatto bironta arg‘umoq olishga ham erisha olmay, miloddan avvalgi 102-yilda
katta sonli qo‘shindan qolgan qoldiq bilan zo‘rg‘a Dun Xuan shahriga qaytadi. Lekin
imperator U-Di 60 ming askardan iborat muazzam bir qo‘shin to‘plab takror hujumga
o‘tdi. Harbiy safar davomida “Shimoliy o‘rdugoh” tashkil etildi va harbiy hujumlar
shu yerdan turib boshqarila boshlandi. Miloddan avvalgi 101-yilda Xan qo‘shini Farg‘ona
hududlariga bostirib kirdi. Yerli aholi ko‘p sonly Xitoy askarlari bilan ochiq maydonda
jang qilishdan qochib, mayda-mayda guruhlarga bo‘linib qal’alarga yashirinadilar.
Poytaxt Ershining qamali 40 kun davom etadi. Mudofaachilar agar Xitoy harbiy harakatlarini
to‘xtatsa, o‘z hukmdori qaysar Muguani o‘ldirishlarini, xitoyliklarga bir necha
“samoviy duldullar” va armiya uchun yemak berishlarini va’da qiladilar. Tinkasi
qurigan Xitoy bu shartlarga rozi bo‘ladilar va bu yerlardan 3 mingga yaqin otni
o‘lja o‘laroq olib ketdilar.
Sima Syanning yozishicha, farg‘onaliklar Muguani o‘ldirib,
sobiq keksa hukmdor Mosoyni taxtga o‘tqizadilar. O‘zgan aholisi xitoyliklar qoldirib
ketgan qo‘shinni oziq-ovqat va yem-xashak bilan ta’minlashdan voz kechib, ularni
qirib tashlaydilar. Bundan xabar topgan Xitoy qo‘shini ortiga qaytadi va O‘zganni
egallaydi. Shahar hokimi Qang‘ davlatiga qochib ketgandi. Uni ham tutib kelib qatl
etadilar. Xitoy qo‘shini o‘z yurtiga qaytib ketishi bilanoq aholi Mosoyni taxtdan
tushirib, Muguaning ukasini hukmdor qilib ko‘taradilar.
Xitoy tarixchilari qadimgi Farg‘ona aholisini tashqi qiyofada
qang‘arlarga o‘xshab ketadi, ular chuqur ko‘zli va qalin soqolli bo‘lganlar deb
ta’riflaydi. Chjan Syanning yozishicha, Dovon 60 ming kishilik qo‘shinga ega bo‘lgan,
otliq qo‘shin harbiy mahoratda tengi yo‘q bo‘lgan. Ularning chopar ot ustida turib
orqaga qayrilib kamondan uzgan o‘qlari dushmanni dog‘da qoldirgan. Ularning ayollari
ham kamondan o‘q uzishda erlaridan qolishmagan. Dovondan to An’sigacha bo‘lgan hududlarda
yashovchi aholining tili har xil bo‘lsa-da, ammo ular bir-birlarini tushunishgan,
ularning urf-odatlari ham bir-biriga o‘xshash bo‘lgan.
Qo‘shimcha qilib shuni aytish mumkinki, Dovon davlatini
egallash faqatgina Xitoy davlatining maqsadi bo‘lmagan. Xususan, Xitoyga qo‘shni
bo‘lgan Sogyui davlatining ham shunday rejalari bo‘lgan. Milodiy 33-yilda Xyan Sogyui
davlatining hukmdori deb e’lon qilindi. Xyan o‘zining zafarli harbiy yurishlari
orqali davlatni yanada yuksaltirdi. Xususan, bu yurishlarning birida, tahminan 46-yilda
Sogyui davlati Farg‘ona hududlaridagi Dovon davlatini zabt etdi. Bu davrda Dovon
ancha kuchli davlat hisoblanardi. Xyanning buyrug‘iga ko‘ra, Gyuim davlatining eski
hukmdori Farg‘ona taxtiga o‘tiradi. Faqat bu hukmdor Dovon davlati taxtida roppa-rosa
bir yil o‘tirdi. Qang‘ davlati Dovonga ketma-ket hujumlar uyushtirdi. Oqibatda xitoylar
Dovonni tashlab chiqib ketishga majbur bo‘ldilar. Sogyui hukmdori Xyan bu davlatdan
katta miqdorda o‘lja va soliqlarni oldi hamda hududni tark etdi.
Xitoy harbiy yurishlari tashkil etilgan bu davr Dovon davlati
uchun og‘ir sinov bo‘ldi. Butun harbiy muhorabalar aynan ularning hududlarida bo‘lib
o‘tdi, shaharlar vayron bo‘ldi, aholisi talon-taroj etildi, ekin dalalari yoqib
yuborildi, tijorat ishlari to‘xtab qoldi va qanchadan-qancha insonlar halok bo‘ldi.
Foydalanilgan adabiyotlar:
1.
Ban Gu. “Istoriya dinasti
Xan”. Moskva, 1964.
2. Prof. Risalet Kerimova. “Turkler”. I jild.
3. Asqarov A. O‘zbekiston tarixi. – Toshkent, 1994.