Маърифат маҳалласида “Хўжа Тақсим ота” зиёратгоҳи мавжуд. Шу қишлоқ оқсоқолларининг айтишича, Хўжатақсим отанинг Мойлисой сувининг келишига хизмати катта. Қадимда қишлоқда яшовчи аҳоли сув танқислигидан ниҳоятда азоб чекар экан. Кунлардан бир кун Аллоҳ таоло Хўжатақсим авлиё отанинг тушида унга баланд тоғнинг энг юқори ерига чиқишини, у ерда Кўлиғуппон кўли борлигини, ўша кўлга асосини теккизиб судраб келса орқасидан сув кўпайиб оқиб келишини баён қилибди. Авлиё ота шу ишни амалга оширади. Қишлоқнинг Гумбаз деб аталувчи жойидан ўтганда одамларнинг “Сув келди, сув келди!” деган хитоблари янграйди.

Хўжатақсим авлиё отанинг мақбараси аввал қабристоннинг ўртасида жойлашган экан. Неча асрлар мобайнида сел ва тошқинлар авлиё отанинг муборак майитлари қўйилган хонақогача ювиб келар, аммо ҳар қандай кучли сел ва тошқинлар ҳам мақбара ёнига келганда ҳамиша чекинар ва унга зиён-заҳмат етказмас экан.

Экспедиция аъзолари маданий мерос объектлари ҳақида қизиқарли маълумотлар берган Муҳаммад Юсуф Мирзажонов, Одилжон хожи Отақўзиев, Роҳатилло Сайдалиев, Ғанижон Жалоловларга чексиз миннатдорчилик билдирадилар.