Шаҳрихон туманидаги Дўлон қишлоғига кираверишда ўтмишда шарқдан-ғарбга қараб чўзилган қадимий Оқравот археологик тепалик жойлашган эди. Ушбу тепалик Буюк Ипак йўли устидаги манзилгоҳлардан бири, шу билан бир қаторда карвонлар тўхтаб ўтадиган манзилгоҳлардан бўлган. Оқравот дейилишига сабаб, бу шарқ дарвозаси вазифасини ўтаган. Савдо карвонларининг барчаси шу жойда бемалол, олиб келган нарсаларини бошқа савдогарларга улгуржасига савдолашадиган жой бўлган.

Оқравот тепалиги ёнида баъзи бир жиноятчиларни жазолашда фойдаланилган “Тўнғиз қўпти” тепалиги мавжуд. Узоқ йиллар Тўнғиз қишлоқ номи билан аталган ушбу макон ҳозирда Гул қишлоқ деб юритилмоқда (Шаҳрихон тумани Бешмаҳалла МФЙда жойлашган).

Қўқон хонларидан Олимхон (ёвузликлари учун халқ уни “золимхон” деб атаган) даврида ҳар турли жиноятчилар ушбу жойга олиб келиниб, турнақатор қилиниб ярмигача кўмилган ёғоч устунларга 3-5-7 кунга боғлаб қўйилган. Жиноятчи белгиланган муддат ичида соғ-омон қолса, у авф этилган. Мазкур Тўнғиз қўпти тепалигида баҳайбат ёввойи тўнғизлар бисёр бўлиб, устунларга боғланган жиноятчиларга ҳамла қилиши аниқ эди. Шунинг учун ҳам ушбу жойда жони омон қолганларгина Шаҳрихон шаҳрида уй-жой қилиб доимий яшашга рухсат этилган.

 Ҳозирда ушбу тепаликнинг озгина қисми маҳалла қабристонига айлантирилган.