Бобохуросон ота мозорининг ёнгинасида қум тепалиги бор, бу ерни “хотин қум” деб айтишади. Бу шифобахш қумдан кўплаб одамлар шифо топадилар. Ривоят қилишларича бу қумда Хитой хонининг қизи ҳам шифо топган экан. Айрим ривоятларда бу қум ўзга юртлардан ташиб келинган дейилади. Аммо қадимда худди шу ердан сой ўтганини ҳисобга олсак бу қум шу сойнинг қуми бўлиши мумкин.

ДУКЧИ ЭШОН ХОНАҚОСИ

Юртимиз мустақиллиги учун курашган ватанпарвар инсон, бутун Россия империясини ларзага келтирган “Андижон қўзғолони”нинг йўлбошчиси Дукчи Эшон ҳам Мингтепада яшаган. Марҳамат туманининг Пахтакор маҳалласида Дукчи Эшон уйининг вайронасидан қолган тепалик мавжуд. Бу ерда Дукчи Эшон томонидан камбағалларнинг болалари учун бунёд этилган мактаб биноси ва минорадан қолган тепалик мавжуд.